فیکٹ چیک: کیا پاکستان سُپر لیگ میں دو نئی ٹیموں کے نام فائنل کر لیے گئے ہیں؟
پاکستان کرکٹ بورڈ (پی سی بی) نے اعلان کیا ہے کہ پاکستان سپر لیگ میں شامل ہونے والی نئی دو ٹیموں کے نام ابھی فائنل نہیں کیے گئے۔
جمعرات کو پی سی بی نے ایک پریس ریلیز میں بتایا کہ بولی کے عمل میں چھ شہروں کی ٹیموں کے نام سرفہرست ہیں۔
یاد رہے کہ اس سے قبل پی سی بی نے اعلان کیا تھا کہ وہ پی ایس ایل میں دو ٹیموں کا اضافہ کر رہا ہے جس کے بعد یہ خبر سامنے آئی تھی کہ نئی ٹیموں کے طور پر فیصل آباد اور گلگت کے ناموں کی حتمی منظوری دے دی گئی ہے۔
پی سی بی نے اپنے بیان میں کہا کہ ’حال ہی میں میڈیا میں گردش کرنے والی خبروں کی تردید کی جاتی ہے جن میں یہ دعویٰ کیا گیا تھا کہ پی ایس ایل میں شامل کی جانے والی دو نئی ٹیموں کے شہروں کے نام فائنل کر لیے گئے ہیں۔‘
پی سی بی نے واضح کیا ہے کہ ’نیلامی کے عمل کے تحت کامیاب بولی دہندگان کو اجازت ہوگی کہ وہ درج ذیل شہروں میں سے کسی بھی شہر یا ٹیم کا نام منتخب کر سکیں جن میں فیصل آباد، راولپنڈی، حیدرآباد، سیالکوٹ، مظفرآباد اور گلگت شامل ہیں۔‘
پی سی بی نے اس بات پر خوشی کا اظہار کیا ہے کہ ’نئی ٹیموں کے فرنچائز حقوق حاصل کرنے میں عالمی سطح پر دلچسپی بڑھ رہی ہے، جو پاکستان میں کرکٹ کے فروغ کے لیے مثبت قدم ہے۔‘
’ٹیم فرنچائز کے لیے عوامی اشتہار 15 نومبر 2025 کو جاری کیا گیا تھا جس میں دنیا بھر کی کمپنیوں اور افراد کو بولی دینے کی دعوت دی گئی ہے۔‘
’بولی جمع کروانے کی آخری تاریخ 15 دسمبر 2025 کی صبح 11 بجے تک مقرر کی گئی ہے جس کے بعد تکنیکی اور مالی پیشکشوں کا جائزہ لیا جائے گا۔‘
پی سی بی نے تمام فریقوں کو تاکید کی ہے کہ وہ صرف سرکاری ذرائع سے ہی معلومات حاصل کریں کیونکہ دیگر ذرائع سے پھیلائی گئی خبریں غیرمعتبر ہوں گی۔
یہ اقدام پاکستان سپر لیگ کی توسیع اور ملک بھر میں کرکٹ کے فروغ کے لیے اہم تصور کیا جا رہا ہے جس سے نئے شہروں کو بھی پاکستان کے سب سے بڑے ٹی20 ٹورنامنٹ میں شامل ہونے کا موقع ملے گا۔
دوسری جانب پی سی بی اور ملتان سلطانز کے درمیان تنازع تاحال حل نہیں ہوا جبکہ پی سی بی نے ملتان سلطانز کے علاوہ دیگر پانچ فرنچائزز کو ویلیوایشن اور تجدید کی دستاویزات بھجوا رکھی ہیں۔
